Nid oes yr un ddelwedd sy"n ailddiffinio hunaniaeth Gymreig yn yr 1990au mor bendant na"r Colin Jackson buddugoliaethus yn gwisgo"r Ddraig Goch ar ei war. Anghofiwch am Cŵl Cymru - dyma brawf byw bod Cymreictod yn gallu bod yn gynhwysol, yn aml-hiliol ac uwchlaw popeth, yn dra hunan-hyderus.

"Dw i"n caru"r ffaith mod i"n Gymro", meddai mewn cyfweliad yn 2002, "Mae"n rhan o"m hunaniaeth. Beth mae"n ei roi i mi? Fy natur hamddenol. Fy anian dawel-benderfynol." Os yw"r man lle cafodd ei eni wedi cyfrannu at ei lwyddiant, yna mae"n sicr ei fod wedi ad-dalu ei ddyled sawl gwaith drosodd.

Ganed Colin Jackson yng Nghaerdydd, a daeth ei ddawn anghyffredin mewn chwaraeon i"r amlwg yn Ysgol Uwchradd Llanedeyrn. Aeth ymlaen i ragori yn y math o gamp sy"n gofyn am ffitrwydd, cryfder, techneg a"r gallu i ganolbwyntio - i gyd wedi eu dwys gyfyngu i ychydig eiliadau o berfformiad ffrwydrol.

Y wobr oedd gyrfa hir ac ysblennydd â"i gwelodd yn ennill yr anrhydeddau rhyngwladol uchaf gyda chysondeb mecanyddol bron. Mae wedi ennill dau deitl Byd a Chymanwlad, tair pencampwriaeth Ewropeaidd yn ogystal â chyrraedd y brig ym mabolgampau dan-do y Byd ac Ewrop.

Ar ôl dod i"r amlwg fel un o"r neidwyr clwydi gorau ar ddiwedd yr 80au, roedd yn siomedig na chafodd fedal yn y gemau Olympaidd ym 1992. Ond hon oedd ei awr dduaf cyn i"r wawr dorri. Mae"r amser o 12.91 eiliad y cymerodd iddo redeg ei ras yn Stuttgart yn y flwyddyn ganlynol, yn dal yn record byd. Ef hefyd yw"r cyflymaf erioed dros 60 medr dan-do.

Mae"r pwysau sydd ar fabolgampwyr proffesiynol heddiw yn aruthrol, ond yng nghanol hyn, mae Colin Jackson yn un sy"n ymddangos fel petai"n mwynhau ei hun. Fe ddaliodd i wenu drwy"r cyfnodau gogoneddus, yn ogystal â"r amserau pan nad oedd ar ei orau neu pan oedd anaf yn cadw llwyddiant draw.

Nid oedd yn un o"r athletwyr hynny a adawodd y llwyfan unwaith eu bod wedi gweld eu dyddiau gorau. Roedd ei natur gystadleuol a"i optimistiaeth fywiog yn ei gadw i anelu at fwy o anrhydeddau pwysig nes iddo benderfynu rhoi"r gorau iddi yn 2002.

Erbyn hyn, mae"r gŵr deniadol a byrlymus hwn yn gweithio i"r cyfryngau, ac yn ymwneud â phrosiectau chwaraeon ac elusennol. Go brin y bydd Colin Jackson yn diflannu.